नेपाली कांग्रेसका केन्द्रीय सदस्य डा रामशरण महतले अख्तियार प्रमुख लोकमानसिंह कार्कीविरुद्धको महाअभियोगका विषयमा छानबिन प्रक्रियालाई प्रभावित पार्ने गरी कांग्रेसले कुनै निर्णय नगर्ने बताएका छन् ।

नेपाल प्रेस युनियन दाङले बिहीबार घोराहीमा गरेको पत्रकार भेटघाट कार्यक्रममा केन्द्रीय सदस्य डा महतले कार्कीका विषयमा छानबिन प्रक्रिया सुरु भएकाले समितिको छानबिन प्रतिवेदनपश्चात् मात्रै कांग्रेसले निर्णय गर्ने स्पष्ट पारे ।

लोकमानको विषयलाई छानबिन गर्न समिति गठन भइसकेको अवस्थामा कांग्रेस न्यायाधीश बन्न नसक्ने उनको भनाइ छ । कांग्रेस संसद्को सबैभन्दा ठूलो पार्टी भएकाले बोल्नुपर्ने अवस्था आएपछि सत्यताको पक्षमा निर्णय गर्नेसमेत उनले उल्लेख गरे।

पूर्व अर्थमन्त्रीसमेत रहेका डा महतले नेपालमा आर्थिक समृद्धिलाई मुख्य एजेन्डा बनाएर अघि बढ्नुपर्ने बताए । भ्रष्टाचार, राजनीतिक अस्थिरता, बन्द हडताललाई अन्त्य गर्दै देशको समृद्धिमा अघि बढ्नुपर्नेमा उनको भनाइ थियो । रासस