यही सेप्टेम्वर १४ देखि २२ सम्म सम्पन्न हुने “फ्लान्दरन अन्तर्राष्ट्रिय ट्रेड फेयर (आसेन्ता)” मा यस वर्षको ‘विशिष्ट अतिथि राष्ट्र’ (गेस्ट अफ अनर) को रुपमा नेपालको सहभागिता हुने भएको छ । सो फेयर बेल्जियमको ऐतिहासिक तथा साँस्कृतिक शहर गेन्टमा आयोजित हुँदैछ । बेनेलक्स मुलुकहरू (बेल्जियम, नेदरल्याण्ड र लक्जेम्बर्ग) कै ठूला व्यापारिक मेलाहरूमा गनिने सो फेयरमा संसारभरिका मुलुकहरू सहभागी हुन्छन् । यसरी सहभागी हुने विश्वका साठी देशहरु मध्येबाट यस वर्षको निम्ति ‘गेस्ट अफ अनर’ को रुपमा नेपाल छानिएको हो ।
बेल्जियमका उप-प्रधान तथा रक्षा मन्त्री पिटर द क्रिमले सेप्टेम्वर १४ मा मेलाको औपचारिक उद्घाटन गर्ने कार्यक्रम छ । समारोहमा पाँचै महादेशका करिब सातसय उच्च ब्यापारिक प्रतिनिधिहरू उपस्थित हुने अपेक्षा गरिएको छ ।
सोह्र हजार वर्गमिटर क्षेत्रफलमा आयोजित हुने उक्त मेलाको मूलद्वारमा एक हजार अट्चालिस वर्गमिटर क्षेत्रफलमा नेपाली मण्डप निर्माण गरिनेछ । मूख्य प्रवेशद्वारलाई नेपाली काष्ठकलाले सिँगारिनेछ । त्यस अगाडी सगरमाथाको विराट चित्र राखिनेछ भने नेपाली कला र संस्कृति झल्किने अन्य चित्रहरुले सजाईनेछ । नौ दिने एक्स्पो अवधिभर युरो नेपाल कलाकार संघ बेल्जियमले नेपालको बहुल लोक संस्कृति झल्किने गीत, नृत्य र संगीतमय सांस्कृतिक कार्यक्रम गर्नेछन् । यसै अवसरमा बेल्जियमस्थित सँघ-सँस्थाहरूको सँयुक्त आयोजनामा एक दिने ‘नेपाल फेस्टिबल’ को छुट्टै आयोजना समेत गर्ने कार्यक्रम छ । एक्स्पो भित्रका ३२० स्टलहरु मध्ये नेपाली स्टलको संख्या ६० रहनेछ । त्यसबाहेक, नेपाली परिकारका निम्ति एक नेपाली रेष्टुरेन्ट संचालन गरिनेछ ।
त्यस्तै प्रवेषाज्ञासम्बन्धी र पर्यटन प्रबर्द्धनात्मक सामाग्रीहरु उपलब्ध गराउने हेतुले नेपाली दूतावासले समेत स्टल राख्ने बताइएको छ । नेपाली पक्षबाट एनआरएन बेल्जियम र नेपाली व्यवसायी संघ बेल्जियमले कार्यक्रमको व्यवस्थापन गर्दैछन् ।
यसअघि गत मार्चमा प्रचारप्रसारका लागि बेल्जियमको डचभाषी सरकारी टेलिभिजन भी.आर.टी. लाई नेपालबारे वृत्तचित्र निर्माण गर्न पठाईएको थियो । नेपालको कला र सँस्कृति झल्किने गरी तयार पारिएको वृतचित्र यही एक्स्पोका अवसरमा भी.आर.टी. को ‘च्यानल एक’ बाट प्रसारण गरिने सो च्यानलको क्याटलगमा परिसकेको छ । वृत्तचित्रमा काठमाडौं, पोखरा, चितवन, भक्तपुर लगायत विभिन्न ठाउँहरूको सुन्दर वर्णन गरिएको जानकारी गराउँदै एक्स्पोले नेपालको ब्यापार तथा पर्यटन प्रबर्द्धनमा ठूलो सहयोग मिल्ने ट्रेड फेयरका नेपाली संयोजक अर्जुनकुमार श्रेष्ठले बताउनु भएको छ । नेपाल व्यवसायी सँघका पूर्व अध्यक्ष तथा एन आर एन बेल्जियमका निवर्तमान आइ. सी. सी. प्रतिनिधि श्रेष्ठले अन्तर्राष्ट्रिय ट्रेड फेयरको पूर्ण तयारी अन्तिम चरणमा रहेको जानकारी दिनुभयो । ट्रेड फेयर लाखौंले अवलोकन गर्ने अपेक्षा गरिएको छ । नेपाल जस्तो सानो स्केलमा आयात-निर्यात ब्यापार गर्ने मुलुकलाइ ‘विशिष्ट अतिथि राष्ट्र’को अवसर दिइनुमा यहाँको नेपाली समुदायको भूमिका रहेको बताइएको छ ।