एक बेल्जियन महिला र उनको नेपाली प्रेमीले नेपालबाट बेल्जियम ल्याउन खोजेको धर्मपुत्रीलाई यहाँको सरकारले अनुमति दिएन । यो समाचारले बेल्जियममा सनसनी फैलाएको छ । बेल्जियमको फ्रेन्चभाषी सरकारी टिभी च्यानल RTBF ले महत्वका साथ दिएको समाचारमा भनेको छ – ‘या त बेल्जियन आमा बच्चीसँग नेपाल मै बस्नु पर्ने भयो, वा छोरीलाई अनाथालयमा छोडेर स्वदेश आउनु पर्ने भयो ।‘
बेल्जियमको ब्रुज सहरका बासिन्दा दम्पत्ति २००५ देखि धर्मपुत्रको प्रकृयामा व्यस्त रहेको समाचारमा जनाइएको छ । बेल्जियन नागरिक बेनेदीक्त भान द सान्द नेपाली बच्चा धर्मपुत्रका रूपमा ग्रहण गर्न चाहन्थिन्, किनकी उनको जीवनसाथी नेपाली मूलका हुन् । तर नेपाल र बेल्जियमबीच धर्मपुत्र/पुत्री ग्रहणसम्बन्धी कुनै कानून नहुँदा समस्या बनेको छ । यही समस्याबाट पार पाउन दम्पत्तिले एक डच वकिलसँग कानूनी सहयोग लिएको र वकिल सन् २०११ मा नेपाल समेत गएका थिए । उनले ग्रहण गरिएकी धर्मपुत्री, जसको नाम दीपिका हो, साँच्चीकै अनाथ रहेको कागजपत्र पनि तयार गरे ।
मानवीय भिसा
बेल्जियन कानूनअनुसार बच्चाको सुरक्षा सुनिश्चित गर्न बेल्जियनको सरकारी अधिकारीमार्फत प्रशासनिक माध्यमबाट पहल गर्नुपर्छ । तर बेल्जियमभित्रै कागजी काम सम्पन्न नभएको कारण दीपिकालाई धर्मपुत्रीको रूपमा प्रवेशाज्ञा दिन नसकिएको सरकारी अधिकारीहरूले बताएका छन् । यहि कारण बेल्जियमको प्रान्तीय फ्लेमिश प्रशासन, संघीय सरकार र काठमान्डुमा रहेको बेल्जियमको वाणिज्य दूतावास (कन्सुलर) कार्यालयहरूले आफ्नो छोरी नेपालमा एक अनाथालयमा छोडेर आउन सुझाएका छन् ।
यो समस्या चर्कँदा ब्रसेल्स-वालोनियाको धर्मपुत्र ग्रहणसम्बन्धी न्यायाधीकारी बेत्रिस बेर्ताँले बताएकी छन्- ‘कानूनतः हेर्दा बेल्जियन कानूनले सो बच्चालाइ बेनेदीक्त भान द सान्दको छोरी मानीसकेको छैन। तसर्थ बच्चीलाई ‘मानवीय भिसा’ दिएर तत्कालका लागि समस्या समाधानको बाटो निकाल्न सकिन्छ ।’