चर्चित बलिउड नायक सलमान खान रिल लाइफमा जति चक्लेटी र रोमाञ्चक छन्, त्यति नै रियल लाइफमा हक्की र रिसाहा स्वभावका छन्। उनी बलिउडका सबैभन्दा बढी रिसाहा स्वभावका छन् भन्ने कुरा बेला बखत उनले गर्ने व्यवहार र गतिविधिले नै पुष्टि गर्दै आएको छ।
केही दिनअगाडि मात्रै उनले आफ्नो असली रूप देखाएको भारतीय सञ्चारमाध्यमले जनाएको छ। हालै बलिउड फिल्म बजरङ्गी भाइजानको सुटिङका क्रममा राजस्थानमा हुँदा आफ्नो कारसँगै बाइक उडाउने केटाहरुको ग्याङलाई सलमानले कुट्न खोजेको समाचारमा जनाइएको छ। फिल्म सुटिङका लागि राजस्थानमा कारमा सवार भइरहेका बेला सलमानले आफ्नो कार सँगसँगै बाइक कुदाउने केटाहरुको समूहलाई कुट्न खोजेको तर गाउँलेहरुले छुटाएकाले ती केटाहरु सलमानको गोदाइ खानबाट बचेको समाचारमा उल्लेख छ।
आफ्नो तस्वीर र भिडियो खिच्नका लागि बाइकरहरु उनको अगाडिपछाडि गरेपछि सलमानले तिनीहरुलाई कुट्न खोजेका हुन्। सलमान र उनको सुरक्षाकर्मी रिसले चुर हुँदै कारबाट झरेको देखेपछि बाइकरहरु भाग्नेतिर लागेका थिए।