प्रवासको भूमिमा रहेर पनि आफ्नो कला, संस्कृतिको जगेर्ना संगै बिबिध नेपाली साँस्कृतिक कार्यक्रमहरु गर्दै आएको ईन्द्रधनुष क्लव बेल्जियमले बिगतका वर्षहरु जस्तै यस वर्ष पनि नेपाली महिला दिदी-बहिनीहरुको महान पर्व हरीतालिका तीज कार्यक्रम बेल्जियममा भब्यरुपमा मनाउने भएको छ ।
कार्यक्रम यहि आउदो ८ सेप्टेम्वर २०१३ आईतवार लुभेनको केसेल-लो को (महायज्ञ भएको) हलमा एक भब्य कार्यक्रमका बिच गरिन लागेको कुरा क्लवका अध्यक्ष श्री सूर्य ढकालले बताउनु भयो । विदेशी भूमीमा रहँदै गर्दा पनि नेपाली दिदीबहिनीलाई आफ्नै माईतीको अनुभव गराउँदै आएको क्लवले यस बर्षको तीज कार्यक्रमलाई बिगतको भन्दा बढी महिला दिदि बहिनीहरुको उपस्थिति तथा अझ व्यवस्थित, सभ्य र भब्य रुपमा सम्पन्न गर्नको निमित्त क्लवका उपाध्यक्ष श्रीमती यसोदा थापाको संयोजकत्वमा क्लव कै सदस्यद्वय श्रीमती पुनम शर्मा र शान्ती भट्टराई सहितको एक तयारी समिति गठन गरेको छ । कार्यक्रमलाई ब्यवस्थित बनाउनका लागी बिबिध साँस्कृतिक कार्यक्रम सहित महिला दिदी-बहिनीको नाचगान, खानपिन लगायत बिबिध मनोरन्जनात्मक कार्यक्रम समेत गरिने जानकारी गराईएको छ ।
– बिष्णु सापकोटा, लुभेन