शिक्षकले धेरै राजनीति गरेका कारण एसएलसी परीक्षामा निकै कमजोर नतिजा आएको आरोप लागे पनि शिक्षकहरूले भने राजनीति गर्न नछाड्ने बताएका छन् । शिक्षकहरूले राजनीति पनि ट्रेड युनियन अधिकारभित्रै पर्ने दाबी गर्दै एसएलसी सुधारका नाममा प्रतिबन्ध लगाउन नपाइने बताएका हुन् ।
आइतबार शिक्षा पत्रकार सञ्जाल इजोनले गरेको कार्यक्रममा नेपाल राष्ट्रिय शिक्षक संगठनका अध्यक्ष बाबुराम थापाले शिक्षकहरूमा राजनीतिक अधिकार रहेको बताए । उनले भने, ‘ट्रेड युनियनको राजनीतिक अधिकारमा कर्मचारीतन्त्रले बाधा पुर्‍याउन खोजे मुद्दा हाल्न पनि सकिन्छ ।’
नेकपा–माओवादीनिकट अखिल नेपाल शिक्षक संगठनका अध्यक्ष गुणराज लोहनीले पार्टीको झन्डा बोकेर नहिँडेको र शिक्षाको सुधारकै लागि लागिरहेको दावी गरे । एमाओवादीनिकट अखिल नेपाल शिक्षक संगठनका अध्यक्ष रत्नबहादुर वलीले पुरानो शिक्षा प्रणालीले नतिजा खस्केको दाबी गर्दै शिक्षकलाई दोष दिएर राजनीतिमा लाग्नबाट वञ्चित गर्न नहुने बताए ।
शिक्षक युनियनका अध्यक्ष दिलबहादुर जोशीले मन्त्रालयको आचारसंहिता पालना गर्न तयार रहेको तर शिक्षकलाई राजनीतिमा बन्देज लगाउन हुँदैन भने ।
यस वर्षको एसएलसी परीक्षामा निकै कमजोर नतिजा आएपछि शिक्षा मन्त्रालयले सुधार गर्न मातहतका निकायलाई २३ बुँदे निर्देशन दिएको छ । निर्देशनअनुसार राजनीति पार्टीको झन्डा बोकेर हिँड्ने शिक्षकहरू जिल्ला शिक्षा कार्यालयको स्वीकृतिविना मनलागी कुनै पनि कार्यक्रममा जान पाउने छैनन् ।
यसपालीको एसएलसी परीक्षामा ३ सय २० सामुदायिक विद्यालयको नतिजा शून्य आएको छ । शून्य नतिजा आउनेमा २५ निजी विद्यालय पनि छन् ।
पनिकाका उपनियन्त्रक प्रल्लाह अर्यालका अनुसार सामुदायिक विद्यालयका ७२ दशमलव ३ प्रतिशत विद्यार्थी फेल भएका छन् । सबैभन्दा बढी उदयपुरमा ३१ सामुदायिक विद्यालयको नतिजा शून्य आएको छ ।
उपनियन्त्रक अर्यालका अनुसार काभ्रे, मनाङ, मुस्ताङ, डोल्पा, मुगु, हुम्ला जुम्ला, बर्दिया, बझाङ, नवलवरासी, धादिङ, म्याग्दी र गोर्खा जिल्लाबाहेक सबै जिल्लाको विद्यालयको नजिता शून्य आएको छ । यी जिल्लामा कम विद्यार्थी र दुर्गम भएका कारण नजिता शून्य नआएको अर्यालले बताए । एउटा विद्यालय मात्र शून्य रहेको ९ जिल्ला रहेका छन् ।
चितवन, अर्धाखाँची, गुल्मी, तनहुँ, दाङ, कालिकोट, ललितपुर र रूपन्देही जिल्लामा एक सामुदायिक विद्यालयको मात्रै शून्य नतिजा आएको छ । केही विद्यालयको प्राविधिक कारणले पनि शून्य नतिजा आएको उनले बताए ।
‘प्रयोगात्मक विषयको नम्बर नपठाइदिँदा सबै फेल भएर कतिपय विद्यालयको नजिता शून्य आएको छ,’ अर्यालले भने, ‘नम्बर आएकाको हालिरहेका छौँ । केही विद्यालय घट्न सक्छन् ।’
खोटाङ र इलाम १४, पाँचथर र सल्यानका १३, रोल्पा ११ र धनुषामा १० सामुदायिक विद्यालयको नजिता शून्य आएको छ । ८६ दशमलव ६८ प्रतिशत विद्यार्थी उत्तीर्ण गराउन सकेको निजी विद्यालयमा पनि २५ विद्यालयको नतिजा शून्य आएको छ । उपत्यकाका १० र बाहिरका १५ निजी विद्यालयको नजिता शून्य रहेको छ ।
शिक्षाविद् तीर्थ खनियाँले सामुदायिक विद्यालयको पढाइको गुणस्तर कम भएका कारण धेरैको शून्य नतिजा आएको बताए । उनले सामुदायिक विद्यालयका शिक्षक पढाउनेभन्दा पनि जागिर खाने मानसिकताका कारण नतिजा खस्कँदै गएको बताए । तर शिक्षकहरू पठनपाठनमा कम जोड दिने र ज्यादा राजनीतिमा लाग्नाले सामुदायिक विद्यालयको पढाइको गुणस्तर खस्केको आमगुनासो छ ।
यस वर्षको एसएलसीमा ४१ दशमलव ५७ प्रतिशत विद्यार्थी उत्तीर्ण भएका थिए । एक्जाम्टेडतर्फ ७ दशमलव ७६ प्रतिशत विद्यार्थी उत्तीर्ण भएका थिए ।