कवि दीपेन्द्र के.सी.द्वारा लिखित ‘नर्थ सिको किनारबाट’ नामक कविता संग्रहमाथि समीक्षात्मक कार्यक्रम सम्पन्न भएको छ | सो कार्यक्रममा एनआरएन युरोप संयोजक अर्जुनकुमार श्रेष्ठ, एनआरएन बेल्जियमका अध्यक्ष प्रेम गुरुङ, एनआरएन आईसीसी सदस्य शिवकुमार बरुवाल र अनेसास बेल्जियमका अध्यक्ष विमल गिरीले सँयुक्त रूपमा पुस्तक लोकार्पण गर्नुभएको थियो ।
अनेसास बेल्जियम च्याप्टरद्वारा बुधवार बेल्जियमको अन्त्वेर्पेनमा आयोजना गरीएको कार्यक्रममा उक्त कृतिमाथि विविध दृष्टिकोणबाट विवेचना गर्दै उपन्यासकार एवं पत्रकार पंचम अधिकारीले ‘कविताहरू सरल भाषामा सुस्पष्ट रुपले लेखिएको र डायस्पोरिक नोस्टाल्जिक तथा राष्ट्रवादी भावहरुले भरीएको’ बताए ।
उत्तर आधुनिक शैलीमा प्रणयरस देखि बिररस सम्ममा कविताहरु सँग्रह गरीएको कृतिको सफलताको कामना गर्दै अतिथि एनआरएन युरोप संयोजक अर्जुनकुमार श्रेष्ठले कृति प्रवासमा अभिलेखको साथै भावी पुस्तालाई प्रेरणादायी हुने बताए|
कार्यक्रममा एनआरएन बेल्जियमका अध्यक्ष प्रेम गुरुङले नेपाली भाषा र संकृतिको संरक्षण र संरक्षणमा एनआरएन अनेसाससँग मिलेर काम गर्न चाहेको बताउदै कविलाई बधाई दिए| त्यसैगरी एनआरएन आईसीसी सदस्य शिवकुमार बरुवाल, तुलसीनाथ सुबेदी, ध्रुब पौडेलले समेत शुभकामना दिएका थिए|
कार्यक्रममा कविहरू डिल्ली अम्माई, मोहन खत्री, दीपकज्योति पौडेल, विमल गिरी, राजकुमार पुडासैनी र धिर्कबहादुर मान मल्लले आ-आफ्ना कविता तथा मुक्तक वाचन तथा शुभकामना मन्तव्य ब्यक्त गरेका थिए|
अनेसास बेल्जियम च्याप्टर प्रकाशक रहेको उक्त कविता संग्रहमा ३० वटा कविता संग्रहित छन्|अनेसास बेल्जियमका उपाध्यक्ष समेत रहेका कवि केसीद्वारा लिखित यो पहिलो कृति हो|